Conclúen as melloras no centro social de Vilamaior

O Concello de Verín vén de concluír o proxecto de humanización da contorna do centro social do núcleo de Vilamaior.

Entre as distintas intervencións que se levaron a cabo mellorouse a cuberta do edificio, instalouse cantería, creáronse novas cimentacións, e integrouse unha estrutura cuberta acorde coa paisaxe local.

Estas actuacións arredor do centro social, nomeadamentre no ámbito da praza do Forno, buscaban transformar este espazo nun ambiente máis accesible, seguro e esteticamente agradable para toda a veciñanza.

As intervencións tamén incluíron a mellora das infraestruturas de acceso, a creación de espazos verdes, a instalación de mobiliario urbano e a renovación das áreas de circulación peonil, co fin de crear un espazo de convivencia nun entorno máis saudable e agradable para toda a comunidade.

Esta acción enmárcase na convocatoria 2023-2024 do Programa de Desenvolvemento Rural (PDR) de Galicia 2014-2020, impulsada á vez polo conxunto de medidas Leader.

O orzamento total ascendeu a 20.824,20 euros, dos cales 10.412,10 euros foron financiados mediante unha subvención da Axencia Galega de Desenvolvemento Rural (Agader), asignada a través do Grupo de Desenvolvemento Rural (GDR) Monteval.