Conta atrás en Verín para a romaría do San Antón, en Ábedes

A vila do Támega xa quenta motores para o primeiro festivo local do ano o vindeiro venres, 17 de xaneiro. Unha data sinalada no calendario comarcal pola celebración da festa na honra ao San Antón, cunha misa na capela de San Antón de Ábedes á que acompaña unha romaría durante todo o día á que acuden anualmente milleiros de persoas.

A principal particularidade da festividade e da xornada do San Antón, patrón dos animais, e o rito polo que o párroco bendice ás mascotas na capela de Ábedes, fundamentalmente cadelos, e que provoca que tradicionalmente a veciñanza leve os animais á misa.

Alén disto, a romaría a continuación é sempre unha cita ineludible para os verineses, que aproveitan para pasar un día de festa no campo, para o que se prenden fogatas para resistir o frío e se degustan produtos derivados do porco trala recente matanza por toda a contorna.

Finalmente, a tradición marca o día de San Antón como inicio do Entroido de Verín, coa habitual aparición en Ábedes dos primeiros cigarróns sempre que a climatoloxía o permita.

A agrupación de Protección Civil do Concello de Verín está a preparar o dispositivo para o venres, e publicará un mapa cos accesos de entrada e saída ao monte e as zonas para aparcar os vehículos.

Programación

O día arrancará en Ábedes cun pasarrúas a cargo do grupo de gaitas do Concello verinés. Estes acompañarán, en torno ás 12,30 horas, a procesión que partirá dende a igrexa parroquial ata a capela no monte, onde a misa solemne está previsto que teña lugar á 13,00 horas.

Tralo xantar, a media tarde esta romaría popular alcanza o seu punto álxido, que continúa coa sesión de tarde, a partir das 16,30 horas, amenizada pola charanga local Los Támega.