A DO Monterrei aproba un orzamento de 1,1 millóns para 2025

O pleno da Denominación de Orixe (DO) Monterrei vén de aprobar o orzamento do Consello Regulador para o ano 2025, cando o habitual ata o de agora era que a dotación do presuposto se aprobara fóra de prazo.

Dende a DO apuntan a que, malia uns últimos meses de 2024 convulsos tralo cese do anterior presidente, Jonatás Gago García, co nomeamento do adegueiro Manuel Vázquez Losada como novo responsable, e a incorporación dun xerente, Gonzalo Losada Lorenzo, as cousas “estanse a facer ben”, facendo posible aprobar o orzamento “en tempo e forma”.

Do total do orzamento, que ascende a unha cantidade superior aos 1,1 millóns de euros, o Consello Regulador prevé destinar o vindeiro ano “máis dun 50%” a accións de promoción da marca Monterrei, tanto a nivel nacional como internacional, segundo afirman dende a DO.

O obxectivo das accións publicitarias, nas que se inclúen feiras, eventos, visitas á comarca e tuneis do viño é o de “chegar a máis público”, dando a coñecer e consolidando a marca Monterrei.

Para o ano 2025 tamén se está a valorar a creación dunha nova campaña de publicidade, aínda por decidir.