O GDR Monteval contará con 664.000 euros para financiar proxectos no rural

O Grupo de Desenvolvemento Rural (GDR-9) Monteval, conformado por tódolos concellos da comarca de Monterrei máis A Gudiña e A Mezquita, contará cun total de 664.191,96 euros nas anualidades 2025-2026 da nova convocatoria de axudas do programa Leader da Axencia Galega de Desenvolvemento Rural (Agader), o GDR que xestionará unha maior cantidade dos 24 de toda Galicia.

Este importe irá dirixido integramente a proxectos no rural de terceiros, tanto produtivos coma non produtivos, privados e públicos. O 65% do montante que se destinará a produtivos está dirixido a empresas e autónomos que busquen coas súas propostas abrir negocios, xerar riqueza no territorio, crear emprego, asentar poboación ou consolidar iniciativas xa creadas.

Dende a publicación da convocatoria, o pasado mércores, agora ábrese un periodo dun mes para a presentación de solicitudes. Segundo a xerente do GDR-9, Ana Pardo, espera que haxa propostas referidas ao “turismo rural, ampliacións de residencias da terceira idade, coworking e coliving, produtos ecolóxicos ou iniciativas de comunidades de montes”.

Pardo recalca a tódolos interesados que non sexan escollidos desta vez que, tras varios anos de prórrogas, despois desta convocatoria virán outras seguro “tanto no 2026 como en 2027”.