Obradoiro de recuperación da memoria oral en Verín

Trátase dun obradoiro de escritura que ten por obxectivo recuperar historias e lembrazas de mulleres da contorna e pasalas á escrita para que así poidan perdurar.

Coordinado pola actriz e directora Mariana Carballal, nada en Albarellos, e impartido pola escritora e profesora picheleira Inma López Silva, convídase a participar nel a mulleres de tódalas idades nun “encontro para recuperar a memoria oral das nosas vilas e compartir as súas historias”.

A inscrición, ben sexa na propia Biblioteca ou chamando por teléfono, é obrigatoria, xa que só hai 15 prazas dispoñibles.

Preguntada pola estrutura do obradoiro, Carballal afirma que as usuarias descubrirán “os distintos tipos de literatura feminina, para o que leremos a algunhas autoras galegas. Pero o eixo central é escoitalas a elas e os relatos que teñen que contar”.

Na segunda sesión, pediráselle ás participantes que “escriban o seu relato vital, calquera que sexa, pola súa conta ou pedindo axuda a unha neta ou filla, por exemplo, e coa axuda de Inma, estilizarase e refinarase”, apunta a actriz de Monterrei.

Pola súa banda, a escritora López Silva engade que a “construción da memoria é universal, e concérnenos a todas”. Ela será a encargada da recopilación e rexistro dos relatos, xa escritos, das usuarias.

Esta iniciativa, que se vén realizando por todo o Estado, está dirixida e organizada pola asociación Clásicas y Modernas (CYM), co apoio do Ministerio de Cultura.