Riós renovará o abastecemento de O Navallo por 324.000 euros

A Xunta de Galicia acaba de adxudicar as obras de renovación e mellora dos sistemas de abastecemento e saneamento no núcleo poboacional de O Navallo, no Concello de Riós. Unha adxudicación que ascende aos 324.000 euros.

Esta actuación, que correrá a cargo da empresa Explotacións Medioambientais S.L.U., prevé executarse durante este ano, establecéndose un prazo de catro meses para a realización dos traballos. Unha intervención que ten como obxectivo dotar a parroquia de San Vicente do Navallo duns servizos de saneamento e abastecemento eficientes,q ue respondan ás necesidades dos veciños.

Esta actuación enmárcase no convenio de colaboración entre a Xunta e o Concello de Riós, segundo o cal a Administración autonómica achegará máis de 325.000 euros para execución destas obras e o Concello contribuirá ao financiamento restante. Será Augas de Galicia a encargada da execución das obras e ao municipio corresponderanlle a recepción, mantemento e conservación das actuacións que se realicen.

Este núcleo de poboación dispón actualmente dunha rede de abastecemento de auga potable e dunha rede separativa de saneamento de augas residuais, na súa maior parte, con canalizacións instaladas hai máis de 30 anos.

Así, a nova rede de saneamento de augas residuais que se vai executar será de tipo separativo, por gravidade, e inclúe a execución de 4 colectores, 9 ramais e 59 pozos de rexistro. Con 1.442 metros dará servizo a un total de 66 vivendas. Mentres, o abastecemento partirá do depósito regulador actual para dar servizo a 76 vivendas mediante unha rede de distribución ramificada, polas características do viario do núcleo. A lonxitude total da mellora da rede é duns 2.000 metros.