O verinés Carlos Folgoso Sueiro gaña o XII Premio Galicia de Fotografía Contemporánea

O fotógrafo Carlos Folgoso Sueiro, natural de Verín, vén de gañar a XII edición do Premio Galicia de Fotografía Contemporánea, un certame que organiza Outono Fotográfico e no que se presentaron 211 proxectos de 41 países e dos cinco continentes.

Tras coñecer o fallo do xurado, Folgoso amosouse “contentísimo, malia non esperarlo, máis se cadra pola cantidade de traballos enviados de tódalas partes do mundo”. O fotógrafo verinés recoñece ademais que este labor “é algo que comecei a facer, con moito amor e na miña terra, hai tan só uns anos debido a un problema de espalda”.

O proxecto premiado chámase “Máis alá do lago”, e trátase dunha viaxe “metafórica, a través das idiosincrasis de Galiza, unha narrativa construída con atmósfera contemporánea que nos transporta a un tempo indeterminado onde se mesturan as realidades sociais e políticas coas lendas galegas e coa súa fronteira con Portugal. A tristeza e o traballo como sinais de identidade, a emigración profundamente enraizada, o que protexemos e o que desprezamos, a tradición e os incendios forestais, as crenzas sincréticas e as mitoloxías, e unha dualidade entre forza e opresión que sempre caracterizou o noso pobo, son os eixos principais deste proxecto”.

Exposición do proxecto gañador

O Premio Galicia de Fotografía Contemporánea consiste na produción dunha exposición e a edición dun libro, ademais de poñer en valor o traballo gañador, itinerando a exposición durante dous anos e distribuíndo a publicación en librarías especializadas.

A exposición resultante do proxecto de Carlos Folgoso Sueiro inaugurarase en decembro na Sala de Exposicións do Pazo de San Marcos (sede da Deputación de Lugo) e logo comezará a súa itinerancia polas cidades galegas, así como por outras localidades de Portugal e do resto do Estado español.