Abre a inscrición para os cursos de extensión universitaria en Ourense

Ata o 14 de febreiro permanecerán abertas as inscricións para os 14 cursos de extensión universitaria que oferta o campus de Ourense para este cuadrimestre. as As persoas interesadas, sexan ou non membros da comunidade universitaria, poderán matricularse a través do Campus Activo da UVigo por un prezo de 40 euros para o público xeral, 26 para a comunidade universitaria e 32 para outros colectivos vinculados á Universidade de Vigo.

Para os estudantes universitarios, estes cursos están recoñecidos cun crédito ECTS por cada 30 horas de traballo, contando os obradoiros cunha media de entre 20 e 35 horas de duración e de 10 a 20 prazas dispoñibles.

Entre as novidades deste cuadrimestre chega un obradoiro de introdución ao gravado contemporáneo dirixido por Javier Blanco. Nel as persoas participantes achegaranse á xilografía, linografía e augaforte e coñecerán diferentes materiais e ferramentas. Tamén se ofrecerá por primeira vez un obradoiro de costura creativa dirixido por Estefanía Carrera e no que se traballará arredor do patrón e a costura a través de telas e prendas recicladas.

Son tamén varias as opcións relacionadas coa danza dispoñibles. Ana María Torrado dirixirá unha titulada “Danzas do mundo e interculturalidade” que abordará un repertorio variado que inclúe danzas dos cinco continentes. Por outra parte, no marco da Aula de Danza Contemporánea do campus haberá dous obradoiros. Un de creación escénica, a cargo de Ainhoa Linaza, e outro de formación, a cargo de Nuria Sotelo.

Os membros da comunidade universitaria e a cidadanía interesada tamén teñen a oportunidade de apuntarse este cuadrimestre ás aulas de artes escénicas do campus.