A aldea modelo de Muimenta contará cun centro social de deseño

O Colexio Oficial de Arquitectos de Galicia (COAG) e o Concello de Carballeda de Avia convocan un concurso de proxectos para deseñar unha proposta arquitectónica para a rehabilitación dunha edificación en ruínas para un centro social multiusos na aldea modelo de Muimenta e os espazos circundantes da finca. O concurso é froito dun convenio de colaboración asinado entre o decano do COAG, Luciano Alfaya, a Presidenta do COAG de Ourense, Emma Noriega, e o alcalde de Carballeda de Avia, Luis Milia.

As propostas que se presenten ao concurso deberán seguir criterios de calidade arquitectónica e sustentabilidade enerxética e medioambiental. As bases do concurso establecen que o centro social deberá facilitar os apoios e coidados da veciñanza, sendo o eixo dun proxecto multidisciplinar que abarca a creación de emprego, a construción sostible, a utilización de novas fontes de enerxía renovables e a economía circular nun ámbito meramente rural que carece destes equipamentos.

Un centro social

O concurso fará realidade a construción do centro social que, en conxunto co proxecto da aldea modelo da Consellería de Medio Rural da Xunta de Galicia, axudará a potenciar non só o núcleo de Muimenta, senón tamén a vida no municipio de Carballeda de Avia co fin de “poñer en valor toda a contorna da comarca do Ribeiro”, sinalan desde COAG.

O novo equipamento establecerase como referente social na aldea e no resto da localidade.

Os arquitectos interesados terán 45 días naturais, desde a súa publicación no Perfil do Contratante do Concello de Carballeda de Avia, para presentar a documentación pertinente e conseguir a adxudicación dun contrato de servizos para a redacción de proxecto e a dirección das obras.

O seleccionado recibirá un premio de 8.000 euros, mentras a segunda e terceira mellores propostas clasificadas recibirán 6.000 e 4.000 euros respectivamente.

O decano do Colexio de Arquitectos de Galicia, Luciano Alfaya, salientou a importancia de que os concellos, tamén os de menor dimensión, poidan organizar concursos de proxectos xa que son os que mellor garanten a calidade dos proxectos arquitectónicos, como se indica na propia Lei de Calidade de Arquitectura, en vigor dende hai dous anos.