A asociación Muíño da Lama critica os danos dunha canteira

O reponte da actividade da canteira de grava instalada nesta parroquia prodúcese por mor da provisión e movemento de áridos que as obras do AVE na zona de Vilar de Barrio están a demandar.

'Como se dunha macabra secuencia de destrución total do monte de Sestelo se tratara, os picos de fortísima intensidade dos barrenos con explosivo utilizados na actualidade na extracción da materia prima mineral, sempre en torno ao mediodía e máis en concreto nas datas 12/12/2012, 19/12/2012, 16/01/2013, e máis recentemente o pasado xoves 7 de marzo, están a provocar un fortísimo impacto tanto no asoleirado, como na estabilidade de estruturas de fábrica, así como na aparición de serias fendas no sillar que están a afectar notablemente a moitos inmobles da arquitectura popular', sinalan dende a directiva do Muíño da Lama, asociación que amenaza con presentar 'denuncia administrativa se a empresa non depón ou mitiga tal intensidade de barrenos e explosións'.