O BNG arremete contra o alcalde polo estado dos hórreos de Loiro

Continúa a polémica trala rehabilitación dos canastros da Aira da Uxeira, en Loiro (Barbadás).

O BNG aclarou onte en rolda de prensa que, se ben o responsable da elaboración deste proxecto foi Xosé Manuel Fírvida (BNG), tenente de alcalde no anterior mandato, "a súa execución foi posterior ás eleccións municipais", que provocaron a marcha do partido nacionalista do goberno.

Polo tanto, atribúen ao alcalde de Barbadás, Xosé Carlos Valcárcel, "unha actitude mentirosa, covarde e neglixente", por atribuír a Fírvida a xestión das obras. "El é coñecedor de que a obra se executou no segundo semestre do ano, cando o BNG xa non formaba parte do goberno", aseguran. Ademais, o grupo nacionalista realizou o pasado domingo unha asemblea na parroquia "onde demostramos á veciñanza que a execución final da obra non se corresponde ao proxecto aprobado e adxudicado polo Concello", defenden.