O BNG de Ourense propón un modelo de enerxía máis sostible

Noa Presas, cabeza de lista do BNG por Ourense, aposta por un novo modelo enerxético, “cada vez máis renovable”, para garantir que unha parte dos beneficios queden no territorio onde se producen. Con iso cre que se pode compensar o impacto que supón. Nun acto no encoro de Castrelo de Miño, Presas comprometeuse a que o liderado no sector en Ourense supoña “desenvolvemento económico e social para beneficiar á xente por riba das grandes eléctricas” a partir do 18-F.

No acto de Castrelo estivo acompañada por militantes e simpatizantes da comarca do Ribeiro así como membros da candidatura do BNG por Ourense: Laura Pérez, Xurxo Rodríguez, Ramón Seoane e Noelia Currás.

Segundo os datos dados a coñecer polo BNG, que recolle estatísticas de Red Eléctrica Española, “Galiza exportou máis de 40,5% da electricidade xerada en 2022 e Ourense concentra o 50% da gran hidráulica sendo o territorio de Galiza que máis potencia instalada ten e a que máis produce”.

Capacidade exportadora

A este respecto, salienta Noa Presas, “Ourense xera aproximadamente o 70% da produción hidráulica de Galiza mais, a pesar destes datos, continuamos a ser a zona do país máis empobrecida: a que ten peores indicadores sociais, económicos e demográficos”. A candidata fixo fincapé en que nas eleccións do 18 de febreiro “xogámonos tamén que modelo enerxético queremos”. Polo tanto, segundo Presas, “o BNG impulsará un novo modelo enerxético que sexa galego, sostible e que deixe beneficios no país. Galiza contribúe xa decisivamente á loita contra o cambio climático e a un modelo enerxético cada vez máis renovable e queremos que así siga sendo, mais non podemos consentir que o modelo sexa ao servizo dos grandes lobbys enerxéticos e contra a xente” reivindica Presas.

En opinión da cabeza de lista do BNG por Ourense, é preciso impulsar unha nova ordenación e un novo modelo, que permita garantir que “unha parte dos beneficios queda no territorio para compensar o impacto”. Do mesmo xeito, comprometeuse a impulsar unha empresa pública de enerxía que aglutine a participación pública do sector en todas as tecnoloxías, da hidráulica á solar ou eólica”. n