Caldelas convida hoxe a unha nova feira de gando

Castro Caldelas continúa coa recuperación da súa tradicional Feira de Gando no Toural da vila, e na xornada de hoxe 2 de novembro conta novamente co evento, organizado polo Concello en colaboración cos gandeiros da comarca. A feira, que se celebra trimestralmente a maiores da feira concurso de setembro, contará coa participación de reses procedentes de distintos puntos da provincia, convertendo o Toural nun espazo de encontro para a compra e venda de cabezas de gando e revitalizando a actividade económica da zona.

Os asistentes tamén poderán gozar dun xantar no recinto feiral con menú tradicional composto de empanada, carne ao caldeiro ou churrasco, ademais de sobremesa, viño, café e chupito. O prezo da comida popular é de 20 euros. Tamén haberá pulpo á feira para quen queira engadilo no menú.