O campo de fútbol de Barra de Miño terá baños novos

O Concello de Coles acaba de licitar a reforma do campo de fútbol de Barra de Miño, unha obra que custará máis de 85.000 euros e que traerá cambios substanciais neste espazo, o principal, a construción de aseos para o público que acuda ao campo. Ademais, tamén está previsto a ampliación do terreo de xogo, a ampliación dos vestiarios ou a renovación das luminarias, cambiando os actuais halóxenos por iluminación LED.

No que respecta aos novos aseos, construirase un pequeno bloque no que haberá un baño para homes e outro para mulleres e persoas con mobilidade reducida. Para dar servizo ao recinto deportivo e conectar a rede de saneamento ao colector xeral municipal, será necesario prolongar a actual canalización un tramo de 20 metros de lonxitude; e para mellorar o servizo de abastecemento actual desde a rede principal será necesaria a realización dun novo ramal de abastecemento, xa que o tubo actual está nun moi mal estado e é moi antigo.

Ademais, tamén se contemplan outras actuacións como a pavimentación da superficie existente entre os vestiarios e o terreo de xogo, dotando a esta contorna dunha zona saneada, para que en época de choivas non se forme barro á entrada dos vestiarios ou da oficina. Para poder aumentar as dimensións do campo, en concreto o ancho do mesmo, proponse realizar unha escavación de desmonte no noiro existente e, por último, preténdese colocar uns vestiarios prefabricados anexos aos actuais.