O CEIP Filomena Dato de Barbadás pide solucións ás súas deficiencias

O estado do CEIP Filomena Dato de Barbadás, con 26 anos de antigüidade, converteuse nun motivo de preocupación tanto para as familias do alumnado, como para a dirección do centro, polo que o Concello de Barbadás vén de mover ficha e pedir solucións.

Dende hai varios anos, as instalacións acumulan filtracións en distintas zonas, localizadas agora no ximnasio, a aula de psicomotricidade ou o almacén, entre outras, o que require actuacións inmediatas, como a substitución de varias cubertas.

Ante esta situación, a concelleira de Educación do Concello de Barbadás, Marga Pérez, mantivo unha reunión co director territorial da Consellería de Educación en Ourense, Jorge Rubén Sampedro Grande, co obxectivo de trasladarlle a urxencia de tomar medidas que solucionen o “cúmulo de deficiencias detectadas e desatendidas durante os últimos anos”.

A propia concelleira resalta que “dende o Concello tratamos de ir solucionando algunhas, pero hai outras que requiren grandes actuacións estruturais para as que é imprescindible contar coa colaboración da Xunta”.

O Concello de Barbadás fai unha achega anual de 200.000 euros para o mantemento dos colexios, en concreto para persoal de conserxería, limpeza, gastos de luz, prevención de pragas ou incendios…”.

O responsable de Educación na provincia de Ourense, segundo explicou Marga Pérez, “amosou o máximo interese en solucionar todas as necesidades que lle transmitimos, tanto dende o Concello como dende a dirección do CEIP”.

Outras necesidades

A reunión tamén serviu para que Marga Pérez puxera sobre a mesa outras cuestións que precisa o CEIP, como “que se pinte a fachada e se solucione o problema de sucidade que crean as pombas no patio de xogos do centro”.