O Concello de Ourense vai pagar outros 400.000 euros á empresa do bus

Desta volta, el Concello de Ourense vén de recoñecer en xunta de goberno a necesidade de pagar 388.991,61 euros máis á concesionaria en precario do autobús urbano, por terse calculado de forma errónea os xuros de demora.

O portavoz municipal do BNG, Luis Seara, sinalou que “temos denunciado en innumerables ocasións a nefasta xestión económica do actual goberno local, xestión que está situando o Concello ao bordo do colapso”, e engadiu que “tamén temos denunciado a situación na que se atopan a práctica totalidade das concesións e as consecuencias que está a ter nas arcas municipais”.

A alta conflitividade xudicial e o xeito en que o goberno local aborda boa parte dos procedementos é outro dos factores que, segundo a formación nacionalista, “incide notablemente na economía do Concello, xa que en moitas ocasións, recórrense sentenzas e prolónganse procedementos xudiciais co único obxectivo de gañar tempo, sabedores de que os mesmos teñen escaso percorrido pero que teñen repercusións económicas para todos moi gravosas”.

Acordo

O acordo acadado en xunta de goberno baséase no auto do Xulgado do Contencioso-Administrativo número 2 de Ourense. Corríxense e actualízanse os xuros correspondentes á execución definitiva da sentenza do procedemento promovido por Urbanos de Ourense. Estableceuse por erro, como cantidade devengada 388.991,61 euros menos, que agora haberá que pagar e que, lembra o BNG, “sairán do peto de todos os veciños”