Obituario | Eduardo Nóvoa, á procura de publicidade nas estrelas

Estás de vagar. Tranquilo. Abres, por pasar o tempo, Facebook. Ves todo tipo de apuntes e, de súpeto, quedas conxelado sen ter que botarlle a culpa a Filomena. Entéraste do pasamento dun amigo!

A moitos/as non lle soará o nome de Eduardo Luis Nóvoa Estévez, veciño de vello da Praza do Ferro. Se cadra, se digo Tatá, como era coñecido, agora xa resulta máis próximo. Mais estou seguro que a veciñanza de Ourense lembra as publicacións editadas por Publicidad Rádar por mor das festas maiores da cidade. El era un dos artífices.

A empresa estivo no andar superior a Calzados Celestino, á beira de Tobaris, no Paseo, onde hoxe hai unha tenda de moda. Alí comezou traballando co seu pai e logo el só.

Era habitual velo coa súa axenda na man buscando empresas que quixeran publicitarse. A súa labia acadaba que as publicacións estiveran ateigadas de anuncios así como colaboracións.

Sei que Eduardo, Tatá, amigo dende nenos e da mesma a idade, andará agora a cen para buscar anuncios e escritos para poder editar unha boa publicación alí onde estea, das festas nas estrelas. Síntoo ben! Unha aperta á familia e amigos/as.