Esixen obras contra o deterioro na liña ferroviaria Ourense-Vigo

Os senadores populares das catro provincias galegas esixen ao Goberno central, mediante unha iniciativa parlamentaria, a actuación urxente na liña ferroviaria Ourense-Vigo, co obxectivo de "rematar coa precariedade, acometendo as imprescindibles obras que acaben co deterioro e a inseguridade que sofre esta conexión", destacou o senador ourensán Jesús Vázquez.

Os populares reclaman a implicación e o compromiso do Goberno coa mellora e modernización da conexión ferroviaria do Miño, "evitando así as constantes incidencias provocadas pola falta de mantemento, demostrando unha vez máis a súa inseguridade e que a conexión entre Ourense-Vigo é impropia do século XXI".

Na moción dos senadores galegos, presentada para o seu debate na comisión de transportes, reflíctese que esta liña data de 1881, sendo construída xa "con moitas estreitezas orzamentarias". O seu abandono, engaden, está a provocar "un alarmante número de problemas, case continuos, na principal conexión en tren entre Vigo e Madrid", engaden.

Neste sentido, Vázquez lembra as últimas incidencias ocorridas en Frieira (Crecente), unha durante o pasado decembro e outra máis este mesmo mes ao abrirse unha gran focha. "Nesta situación, os viaxeiros atópanse na obriga de facer transbordos por estrada xusto cando o traxecto pola autovía A-52 ten pechado o túnel do Folgoso en sentido Ourense, aumentando en máis de media hora o percorrido", critican.