Luca Chao: “O feminismo é crer na igualdade, debe ser un obxectivo compartido por homes e mulleres”

Luca Chao asina o libro “Feminismo en cen palabras”, no que debulla un cento de conceptos básicos sobre o movemento. Recentemente presentou o seu traballo na cidade, nun encontro no espazo Nobel no que a acompañaron -di que é “un orgullo”- tres autoras ourensás, Ánxeles Cuña, Paloma de Toro e Alba Guzmán.

Que se pode atopar o lector?

Trátase dun libro de iniciación. A idea é que sirva de entrada ó pensamento feminista a alguén que nunca se aproximara. Propoñemos facelo a través de cen conceptos fundamentais dunha forma amena e didáctica.

A pesar do gran esforzo de divulgación, segue malinterpretándose o que é o feminismo.

Si, absolutamente. Para min, ese é un dos motivos máis importantes que me levaron a escribir este libro. Para desmontar de forma radical o de que o feminismo é algo contrario ó machismo, coma se foran os dous puntos da mesma cousa. Precisamente, unha das palabras clave do dicionario é a propia definición do feminismo, que non é outra cousa que a crenza na igualdade entre mulleres e homes. Entendo que debería ser un obxectivo compartido por todas as persoas, e debería alertarnos ante calquera que diga con moita contundencia que non é feminista.

Como escolleu os conceptos?

Foi o máis bonito de todo o proceso. A idea tívena dando clase no mestrado de Igualdade da Universidade de Santiago. Propúxenlle ás miñas alumnas que puidésemos armar un dicionario feminista de forma colectiva. Fixémolo cunha tormenta de ideas e ó modo clásico, a profesora cun xiz no encerado, sumando moitas palabras, ata ver cales eran as cen nas que máis coincidiamos.

Como encara o feminismo galego o vindeiro 8 de marzo?

Cunha urxencia democrática. Son moi optimista respecto á sociedade, os avances que se produciron nos últimos anos son impecables. Pero isto vai na dirección contraria do que acontece na esfera pública. Dende a irrupción da extrema dereita no Congreso, preténdese normalizar que se cuestione a existencia da violencia machista, mesmo dicindo que é un invento ideolóxico e ignorando que haxa 1.191 mulleres mortas dende 2003. Creo que o feminismo afronta a data coa necesidade de recordar que os avances non son terreo conquistado. Están en permanente debate, e urxe recordar as múltiples fendas que seguen existindo entre homes e mulleres, no eido laboral, no dos coidados...