Galería | Niñodaguía disfruta dun novo encontro de "cacharreiros"

NIÑODAGUIA 16/08/2024.- Encontro cacharreiro en Niñodaguia. José Paz

O X Encontro de Cacharreiros de Niñodaguia (Xunqueira de Espadanedo), que se celebra no Museo da Olería de Niñodaguia ata o domingo 18, comezou no día de onte, permitindo achegar a centos de persoas o tradicional oficio dos oleiros.

Entre os participantes desta edición atópanse os cacharreiros de Niñodaguia Agustín Vázquez e Enrique Cabana, Olería do Batán (Baños de Molgas), Carlos San Claudio (Vigo), Antón Román (Gondomar) e Susana González (A Coruña); e en representación da olería portuguesa, os artesáns Carlos Lima e Xana Monteiro. A eles uníronse o telleiro O Buraco, o torneiro Adrián Pena (Vigo) e a cesteira Julia de la Cal (O Porriño).

A programación de actividades inclúe demostracións ao vivo e venda de pezas, así como visitas guiadas ao Museo da Olería de Niñodaguia, que se desenvolverán tamén hoxe e mañá en dúas quendas, ás 13,00 horas e ás 18,00 horas. O programa complétase coas actuacións de música tradicional. Onte foi a quenda de Xunquereteiras; hoxe sábado, actúan Os Trabazos, a partir das 20,00 horas.

O director xeral de Comercio e Consumo, Gabriel Alén, e a xerente da Fundación Artesanía de Galicia, Elena Fabeiro, participaron na apertura do event, onde resaltarno o papel da olería tradicional na Artesanía de Galicia e a importancia do apoio institucional a este tipo de eventos monográficos que contribúen a manter, amosar e poñer en valor estes oficios artesanais.

O evento, organizado polo Concello de Xunqueira de Espadanedo, estase a consolidar como unha cita de referencia para o sector da olería e da cerámica, tras celebrar este ano a décima edición.

Fotos: José Paz