“Este é un goberno de ocurrencias, de nula xestión e de despilfarro'

Que balance faría do seu labor na oposición?

Deben ser os cidadáns os que o fagan, pero eu encóntrome satisfeito porque estamos controlando e fiscalizando a acción do goberno, que hai moito que facer porque estamos asistindo a unha parálise total do Concello.

A que se refire?

Os grandes proxectos de interese xeral están totalmente paralizados. Teño aquí o que hai un ano pregoaba o alcalde e todo está incumprido, algúns proxectos incluso están pendentes dende 2007: a redución a 30 días do pago ós proveedores, o tranvía, o mecanismo de votación a través de internet, o bulevar termal...

Pero aínda estamos no primeiro ano do mandato...

Si, pero estamos falando de temas nos que non se puxo nin a primeira intención e de que aínda non se resolveron os proxectos que viñan do 2007: o transporte metropolitano, o xardín botánico, a Casa da Mocidade e da Maxia seguen no recordo... O Plan Estratéxico Termal non se desenvolveu e éste, xunto co AVE, permitiría revitalizar a vida económica e social desta cidade. O momento actual do Concello é unha radiografía viva e actualizada do 2007 e se lle facemos unha resonancia magnética aínda vemos ese trípode de ocurrencias, despilfarro, nula xestión e agora teño que engadir mentiras.

Neste ano decidiuse o modelo da estación do AVE. En que lugar quedaría o PP ourensán se Fomento decidira seguir co de Foster, ó que vostedes se opuxeron?

O PP non se opuxo a ese proxecto, senón a un proxecto unilateral e socialista auspiciado polo alcalde de Ourense e polo goberno da cidade, aínda que polo BNG non. O PP continúa coa mesma tese que tiña, que é facer un estudio de viabilidade técnica e económica para soterrar a integración da alta velocidade, que resolvería de forma definitiva a cicatriz entre A Ponte e O Vinteún. Non queremos caprichos, como quixo levar adiante o alcalde, queremos consenso e que a integración da alta velocidade se faga nas mellores condicións posibles. Agora o alcalde, cando xa non ten a Zapatero, di que hai que consensuar. Tarde piou, cando esto podía estar resolto hai anos.

O consenso chegou co PERI das Burgas.

O 19 de setembro de 2011 pedín unha entrevista ó alcalde para dicirlle que nos proxectos estratéxicos contara connosco: o transporte metropolitano, o Plan Estratéxico Termal, o PERI das Burgas, San Francisco, xardín botánico, a estación depuradora... No único que nos pediu colaboración foi para o PERI das Burgas e as normas transitorias. Polo demais, ó alcalde o único que lle interesa é estar reivindicando, porque pensa máis no seu interese que no dos ourensáns e non bota man do PP. Pero que lle quede claro que eu me puxen o seu carón para os temas estratéxicos.

Este mandato estase a caracterizar pola crispación. Está satisfeito da relación entre goberno e oposición?

Non cabe dúbida de que estamos facendo unha oposición forte pero cando nos atopamos con obscurantismo, falta de transparencia, estannos toreando día si e outro tamén e temos unha concelleira como a de Urbanismo que nos despreza con non convocar xuntas de área comprenderá vostede que amables non podemos ser pero reivindicativos e fiscalizadores si, mal que lles pese.

O grupo de goberno practicamente coincide co do mandato anterior e non había esta tensión coa oposición. O grupo do PP non fiscalizaba ben daquela?

Será outra forma de levar a oposición. Nós somos reivindicativos. Farían oposición os nosos compañeiros, como non, pero nós notamos que dende 2007 a 2011 os proxectos estratéxicos seguen tan improductivos coma sempre e nós non podemos deixar pasar que continúen no esquecemento por non facer unha oposición máis forte. Cando revisamos que o que ía ser xardín botánico é un gran fraude e un gran timo para os ourensáns, que a estación de bombeo do Couto segue sen funcionar, que un spa que valeu un millón de euros leva ano e medio pechado, non podemos ser condescendentes. Temos que ser reivindicativos. O que non facemos é xudicializar a vida política, porque ese é o fracaso da política.

E non o farán con Montealegre a pesares das irregularidades das que falan?

Nós estamos facendo acción política e aínda esperamos que rectifiquen. Cando fun a última vez, vin que estaban prantando árbores, a pesar de que están certificados dende decembro. Polo tanto, claro que hai graves irregularidades pero nós esperamos que o solucionen. Certificaron e recepcionaron porque querían cobrar (a subvención) xa que acababa o prazo a finais de decembro. Agardamos que agora teñan os equipamentos que se certificaron no sitio onde teñen que estar.

Se vostede saíra alcalde, que tería feito con Montealegre?

Ó mellor, o que fixo Marta Arribas, pechalo. Como se inaugurou un xardín botánico sen auga e sen electricidade? Non queda outra que pechar mentras non se poida levar a cabo as obras que faltan. A partir de aí, abriríao segundo o obxectivo para o que foi creado, como xardín botánico, pero tamén lle explicaría ós ourensáns que houbo un goberno que mentiu descaradamente. n