Investigadores da USC estudan a adaptación á calor en Ourense

Un grupo investigador procedente das universidades de Santiago de Compostela e Toulouse (Francia) converterá a cidade de Ourense no foco dunha xornada de estudo sobre a adaptación das cidades á calor. Será unha iniciativa de entrada libre que se desenvolverá entre o 3 e o 6 de xuño na Biblioteca Pública Nós.

O propósito da Escola de Calor “Refuxios climáticos en Ourense?” -así se chama- é convidar a cidadanía a pensar sobre os modos de adaptación dos territorios e das formas de vida ás temperaturas derivadas da mudanza climática, segundo trasladan fontes da USC. Precisamente, a biblioteca converterase nun caso de estudo. Diagnosticarase o confort térmico do edificio. Ao mesmo tempo, “en diálogo cos principios da ciencia aberta”, din dende a USC, os investigadores abrirán as pesquisas á cidadanía “mediante un programa público e aberto de actividades orientadas á imaxinación colectiva dunha cidade en proceso de adaptación á calor”.

O programa desta Escola de Calor comezará o luns ás catro da tarde cunha serie de entrevistas cos usuarios da biblioteca na entrada do edificio. Repetiranse nas seguintes xornadas, xunto con “moitos outros obradoiros e sesións prácticas de interese para a cidadanía”. Nun plano máis estritamente teórico, “haberá varias mesas redondas sobre cambio climático e espazos cidadás ou saúde e calor extrema”, así como “conversas con entidades ambientalistas e da cultura”, explican dende a Universidade de Santiago.