Maio, a festa da lingua

Alumnos e docentes da provincia disfrutaron onte dunha xornada lonxe das aulas para celebrar a tradicional Festa da Lingua, unha actividade que ten como obxectivo potenciar entre os máis cativos o uso do galego. O punto de encontro deste ano foi o salón de actos do colexio Maristas.

Estaban convidados máis de 600 mozos dos colexios da provincia adscritos á Federación Española de Relixiosos da Ensinanza de Galicia(Ferega); é dicir, A Purísima, Miraflores, Carmelitas, Maristas, Franciscanas, Josefinas, Salesianos e Sagrado Corazón de O Carballiño. Desta vez, tocoulles afinar as súas cordas vogais para cantar e recitar poemas do nado en Outeiro de Rei Manuel María, escritor ao que este ano se lle adica o Día das Letras Galegas. Unha mañá de diversión "na que nos xuntamos tódolos colexios para rendir homenaxe á figura de Manuel María", explicou Mara Ruiz, alumna de Josefinas, de 10 anos. Unha idea compartida por Anselmo Iglesias, de Maristas, que destacou que a de onte foi unha xornada "moi bonita na que sempre se aprenden novos poemas do escritor". O público tamén tivo a oportunidade de disfrutar do espectáculo que a compañía Tropa de Trapo tiña preparado para a ocasión.

A coordinadora galega dos equipos de Normalización e Dinamización Lingüística da comarca de Ourense, René Forneiro, explicou que a actividade "se celebra en varias cidades de Galicia e á que asisten os alumnos que participaron na lectura dos libros finalistas do Premio Frei Martín Sarmiento". O ano pasado tivo lugar no Auditorio Municipal e o obxectivo é que a Festa da Lingua vaia rotando por tódolos centros da provincia levando música e obras de teatro en galego.

O sentimento común dos mestres alí reunidos era a necesidade de organizar máis actividades deste tipo nas que potencia o uso do galego e o coñecemento sobre a cultura de Galicia. "É fundamental promover actividades a prol do galego, unha lingua de moitos séculos e que forma parte da nosa identidade. Sen embargo, cada vez son máis escasas", destacaron varios profesores.

A Deputación de Ourense tamén contribuiu á celebración da actividade, agasallando cun lote de libros aos centros participantes.

A xornada rematou cun recital de poemas de Manuel María, entre eles, "A fala", no que o chairego destacaba que "O idioma é a chave/ coa que abrimos o mundo; /o salouco máis feble,/ o pesar máis profundo".