Medio Rural apoia medidas a prol do desenvolvemento rural da Peroxa

A conselleira do Medio Rural, María José Gómez, acompañada pola directora xeral da Axencia Galega de Desenvolvemento Rural, Paz Rodríguez, visitou onte A Peroxa, onde foi recibida polo alcalde, Manuel Seoane, para coñecer diversas iniciativas apoiadas pola Consellería para contribuír ao desenvolvemento das zonas rurais cun investimento de máis de 150.000 euros.

Neste sentido, a conselleira visitou o Museo do Lebre, unha proposta de recuperación etnográfica nada co obxectivo de revalorizar a figura do Lebre de Casarizas, un artesán e inventor que trouxo a innovación ás tarefas do campo. As instalacións contan tamén cun punto de información para ofrecer asesoramento aos visitantes, así como datos doutros lugares de interese a nivel turístico. Medio Rural, a través da intervención Leader, colaborou cunha achega de preto de 66.000 euros xestionada polo Grupo de Desenvolvemento Rural Adercou para a súa posta en marcha.

Mellora de camiños

A conselleira visitou tamén algúns dos camiños que se mellorarán ao abeiro do Plan Camiña Rural 2025-2026, co que se actuará en Ferradal, O Val, O Souto, Corvelle-Gueral e Corneda-A Touza, cun investimento de preto de 70.000 euros. A maiores, Medio Rural destinou preto de 20.000 euros para un proxecto de saneamento en Gueral.