Menor e González defenden en Leiro as políticas territoriais populares

O conselleiro de Emprego, Comercio e Emigración, José González, dixo onte nun mitin en Leiro que as políticas do Partido Popular ante o reto demográfico “son un exemplo para Europa”. No marco da campaña das vindeiras eleccións europeas do 9 de xuño, González defendeu o traballo da Xunta de Galicia para atraer e reter talento a través da Estratexia Galicia Retorna, entre outras liñas de acción.

Segundo manifestou, o PP “traballa arreo” pola provincia de Ourense, “impulsando e dinamizando a economía, fomentando o emprego por conta allea e o autónomo, e simplificando e axilizando os trámites para facilitar a actividade económica”.

Pola súa banda, o líder provincial dos populares, Luis Menor, aseverou que “o PP será o mellor aliado que o rural ourensán terá en Europa”. Neste sentido, subliñou unha das propostas destacadas do programa para estas eleccións, “a declaración do sistema alimentario como sector estratéxico”.

Un dos compromisos do PP “é loitar por un rural de oportunidades, sen cidadáns de segunda, cos mesmos servizos que os habitantes das vilas e da capital”. Ao mesmo tempo, Menor lamentou que “a peor noticia que nos podían dar para o rural é que o PSOE leve como cabeza de lista a Teresa Ribera, a persoa que desprotexeu aos gandeiros fronte o lobo e un membro do goberno que cargou contra sectores clave como o da carne”.