Menor require aos seus que non deixen portas “sen petar”

Que a militancia “non deixe unha porta sen petar”. Iso foi o que pediu o líder do Partido Popular de Ourense, Luis Menor, nun mitin de campaña celebrado onte no Carballiño. “Necesitamos que todos os nosos alcaldes, portavoces, concelleiros e militantes percorran cada un dos pobos e lembren que Ourense ten que facerse notar en Europa”, declarou.

As palabras de Menor teñen lugar apenas horas despois de que a presidenta da Comisión Europea e membro do Partido Popular Europeo, Ursula von der Leyen, acudise á romaría do PPdeG no Pino (A Coruña) este sábado. Adrián Vázquez, candidato do PP ao Europarlamento, cualificou de “espectacular mitin” o acto. Tal e como dixo, a mandataria da Unión asegurou que o grupo popular europeo “fará súa” a iniciativa do PP para crear comisarías -o equivalente dos ministerios na UE- de agricultura, pesca e medio ambiente, de tal xeito “que non haxa comisarios a tempo parcial facéndose cargo da defensa do sector primario”.

Neste sentido, Vázquez defendeu a rebaixa do IVE nos alimentos, especialmente na carne, as conservas e mailo peixe. Segundo dixo, isto “permitirá poñer en valor en Europa produtos senlleiros como o polbo á feira do Carballiño, unha actividade que ademais de tradición ten un significativo peso económico e de emprego”.

Ao mesmo tempo, o candidato popular fixo un chamado aos vindeiros representantes dos cidadáns no Parlamento Europeo para que afronten os cambios que se precisan noutros ámbitos. Entre eles, citou “menos burocracia, maior flexibilidade e máis sensibilidade cos esquecidos pola transición enexética”.

"Demostración de forza"

No mitin dos populares de cara ás vindeiras eleccións europeas do 9 de xuño tamén falou o líder do partido en Ourense, Luis Menor. Ademais do chamado a traballar os votos porta por porta, o dirixente subliñou o “moito que se xoga” o PPdeOu: “Nin máis nin menos que demostrar que o continuo aumento do apoio electoral ao PP na provincia desde as xerais de 2023 é toda unha demostración da nosa forza como partido de goberno”. Menor mostrouse seguro de que o PP verase respaldado na comarca carballiñesa, onde obtivo un 42% de votos nas europeas de 2019.