A montaxe de Pazolandia en Ourense encara os últimos detalles

A montaxe de Pazolandia encara a recta final. O presidente da Deputación, Luis Menor, visitou este xoves pola tarde o pavillón Paco Paz para comprobar o avance dos traballos. Segundo trasladaron dende a institución provincial, agradeceu o traballo dos responsables do Pazo dos Deportes para que o Pazo volva ser “un clásico da diversión no Nadal na nosa provincia”.

Pazolandia abrirá o vindeiro martes 26 e permanecerá aberto ata o 4 de xaneiro en horario de 11,00 a 14,00 horas e de 17,00 a 20,00 horas, coa excepción do día 1, cando só abrirá pola tarde. Fontes da Deputación detallaron que nenos de máis de 60 concellos ourensáns visitarán o parque de atraccións, que contará con dúas novidades.

Unha delas é o “Boomerang”, unha atracción de 22 metros de altura consistente nun péndulo que xira sobre o seu eixo. A outra é a “Pasaxe terror”, que recolle as últimas tendencias deste xénero cinematográfico. Ademais, crearase o “Mundo do xoguete”, unha zona especial “con todas as tendencias en xoguetes” para bebés e cativos de ata cinco anos.

Como é habitual, non faltarán os clásicos: hinchables, coches de choque, zonas de videoxogos, “a ola” ou o “saltamontes”, entre outras atraccións. Haberá gardarroupa gratuíto e opcións de restauración “para todos os gustos”, puntualizan dende a Deputación.

Segundo estiman fontes da institución, a afluencia rolda as 25.000 persoas durante as vacacións de Nadal. A entrada custará 5 euros para o público xeral e 4 euros para grupos en viaxes dos concellos da provincia. Os títulos de acceso poden comprarse a través de internet, para o que só hai que formalizar o pago mediante a páxina web de Pazolandia.