Mozos e maiores partillan xogos de hoxe e de sempre

A cidade de Ourense acolleu onte a vixésima edición das Xornadas Interxeracionais que organiza a UVigo, unha cita que cada ano une a persoas con diversidade e integrantes das Aulas de Terceira Idade co resto do alumnado arredor de xogos actuais e de época co obxectivo de rachar as barreiras da diferencia de idade e entre os diferentes colectivos.

Nesta edición participaron arredor de 200 persoas, que comezaron lendo un manifesto, ás 10,00 horas na Praza Maior, reivindicando a necesidade de crear espazos de encontro interxeracionais nos que partillar experiencias. Posteriormente, trasladáronse ata o pavillón para compartir xogos e remataron compartindo unha merenda. “Estas xornadas consolídanse como un referente estatal de boas prácticas”, explica o profesor da Facultade de Educación e Traballo Social, Millán Brea.