O oficial de Bombeiros de Ourense: "É necesario incorporar persoal"

A chamada para acudir á explosión nunha casa de Ourense dun depósito de gas evidenciou este mércores á escaseza de medios humanos do Parque de Bombeiros da cidade.

"E iso que onte non foi das situacións nas que nos vimos máis curtos de persoal", explica José Benito Álvarez González, oficial de Bombeiros de Ourense. "Neste momento somos 50 e é preciso chegar a 70 efectivos", explica Álvarez, para asegurar a actuación destes profesionais en todos os incendios, accidentes de tráfico ou apoios en lumes forestais nos que é fundamental que interveñan.

Unha maior dotación de bombeiros no parque ourensán é unha das principais e máis lonxevas reivindicacións do colectivo. "Desde o 2012 pedimos que se incorporen máis profesionais. En 12 anos entraron catorce bombeiros, pero xubiláronse outros tantos...", conta José Benito Álvarez.

O oficial de Bombeiros de Ourense explica que neste momento están "pendentes de que todos os responsables se poñan de acordo para ampliar persoal. Non é cuestión de azuis ou vermellos, é necesario incorporar persoal".