Pablo Pérez, coas asociacións de veciños de Muimenta e Abelenda

O deputado provincial de Cooperación, Pablo Pérez, visitou onte as zonas afectadas pola vaga de lumes que se estendeu polo concello de Carballeda de Avia, a raíz da solicitude de colaboración que fixeron á Deputación provincial de Ourense as asociacións de veciños de Muimenta e Abelenda, dous núcleos dos máis afectados. Pablo Pérez asegurou que o ente provincial "porá a disposición delas os mecanismos dos que dispón para paliar estes problemas máis inmediatos: os arquitectos da Deputación para a rehabilitación das vivendas, os servizos do Inorde para a elaboración de estudos de recuperación do monte e tamén poremos a disposición dos veciños a maquinaria que poida ser necesaria para acondicionar as captacións e traídas de augas".

Con esta última medida preténdese "evitar que as posibles choivas do inverno provoquen riadas e que as cinzas danen máis os mananciais ou mesmo inunden os pobos", sinalou. Nese sentido, engadiu que "a Deputación provincial tamén sufragará os gastos que supón restituír esas traídas de auga".

Esta acción inscríbese no marco de actuacións que a Deputación provincial de Ourense puxo en marcha "para dar unha resposta inmediata aos veciños afectados polos incendios, sendo a primeira deputación en tomar medidas para paliar os danos e as necesidades dos veciños da provincia de Ourense", sinalou o deputado provincial de Cooperación.