Premios para os mellores traballos sobre o Estatuto de Autonomía de Galicia

O premio Estatuto de Autonomía de Galicia cumpriu onte dez anos. O Teatro Principal acolleu a entrega de distincións a escolares dun galardón que se celebra cando se cumpren 42 anos da aprobación da norma básica institucional galega. O presidente da Deputación de Ourense, Manuel Baltar, presidiu esta edición baixo o lema “Galicia, catro provincias”. Houbo máis de 300 rapaces da provincia que presentaron os seus debuxos e redaccións ao concurso: destes, o xurado seleccionou onte a 40, que presumiron do seu recoñecemento no escenario.

“Hai que seguir afondando na importancia do Estatuto de Autonomía para Galicia, unha ferramenta fundamental no noso desenvolvemento”, dirixiuse Baltar aos representantes dos centros educativos, en agradecemento pola súa participación. Tamén subliñou o papel da Deputación de Ourense no certame e na propia aprobación do Estatuto de Autonomía. Tamén destacou a Ourense como “berce do galeguismo”.

O presidente do Parlamento de Galicia, o ourensán Miguel Santalices, remarcou a importancia de ser a “única provincia galega que celebra a través dun acto oficial este Estatuto, un traballo de moita xente, ao que lle debemos moito”.

Os corenta alumnos premiados pertencen aos centros Divina Pastora, Sagrado Corazón O Carballiño, Miraflores, Concepción Arenal, Padre Feijóo, La Purísima e Julio Gurriarán de O Barco.