Profundo pesar no ensino público ourensán pola morte do profesor Ricardo Padrón Chao

O docente, figura clave do ensino público ourensán e recoñecido polo seu compromiso educativo, deixa unha pegada imborrable na comunidade escolar. A súa paixón pola ciencia e os números tivo tamén o seu reflexo no ámbito familiar coa destacada traxectoria do seu fillo, Martín Padrón, recoñecido mozo xenio das matemáticas a nivel internacional.

A comunidade educativa do IES Universidade Laboral e o ámbito docente da provincia lamentan o falecemento do catedrático de Matemáticas Ricardo Padrón Chao. Coa súa marcha, o ensino público galego perde unha das súas figuras máis queridas e un referente de vocación, proximidade, entrega e rigor académico.

Baleiro

Ricardo Padrón desenvolveu unha destacada carreira docente en varios centros educativos de referencia na provincia. Desde o ano 2013 exercía como docente no IES Universidade Laboral, deixando un baleiro profundo entre os seus compañeiros de claustro, persoal non docente, e as sucesivas promocións de alumnado ás que ensinou coa paciencia e a proximidade que o caracterizaban.

O amor polos números e a paixón polo coñecemento que Ricardo trasladaba ás súas aulas trascendeu tamén no ámbito persoal. O profesor era pai de Martín Padrón Rodríguez, considerado un dos grandes mozos prodixios e xenios das matemáticas no ámbito galego e estatal. Ricardo xa forma parte eterna do ADN da Universidade Laboral.

Desde o equipo directivo e toda a comunidade do IES Universidade Laboral enviámoslle o máis sentido pésame, así como todo o apoio e agarimo, á súa familia, amizades e achegados nestes momentos de dolorosa perda.