“Retrasar o PXOM podería levar o concello á quebra'

Visto con perspectiva, arrepentiuse algunha vez de ser alcalde?

En absoluto. Creo que as circunstancias foron difíciles pero penso que era o momento no que había que decidir con responsabilidade e ter coherencia política. Era a miña obriga cos cidadáns, unha vez que te presentas a unhas eleccións e que te elixen, aínda que sexa nunha lista para ser concelleiro.

Cre que cumpriu as expectativas?

Honesta e sinceramente, creo que si. A visión que eu teño é que quizais as pequenas cuestións do día a día tapan un traballo intenso. Falo do Plan Xeral, dos pasos que se deron no Plan Estratéxico Termal e a área das Burgas e todos estes equipamentos que están empezando a funcionar, como o Banco de España, o claustro de San Francisco ou o centro cívico de Seixalbo. Ademais, aínda cos problemas que poidan xurdir no día a día, os grandes servizos do Concello funcionan á perfección.

O seu gran reto agora é aprobar o Plan Xeral. Diría que é o mellor?

Este é un Plan moi pensado, sólido e sostible; que non queremos que sexa anulado polos tribunais. Polo tanto, é prudente pero razoable en canto ás previsións de crecemento de superficie residencial, trata de recoller os proxectos estratéxicos da cidade e reforzar o déficit que temos de equipamentos públicos e de solo empresarial.

Tócalle tramitalo en minoría.

Eu aquí apelo ó consenso e á altura de miras da oposición. Creo que non é unha cuestión partidista porque estamos tratando un Plan que ten que ser o mellor para 20-25 anos e, sobre todo, que é a solución a unha situación moi, moi difícil. Se nos retrasamos substancialmente, colocamos ó Concello ó borde dun precipicio económico, xa que se chega a anularse a normativa provisional poderíamos vernos abocados a unha auténtica quebra polas demandas, de máis de 100 millóns de euros, e, a maiores, as derivadas desa ordenación provisional. Ante esta situación, non é o momento de facer política de oposición nin desgaste do goberno, senón pensar no mellor para a cidade porque hai tempo de resolver aqueles pequenos erros que poida ter. Gustariame salientar que é un Plan que recibiu o aval da Dirección Xeral de Urbanismo e publicamente foi apoiado por Agustín Hernández, que mostrou o seu desexo de que se aprobase para ter un Plan o antes posible. Considerando que a Xunta é a que ten que aprobalo definitivamente, eu pediría a PP, BNG e DO que, por responsabilidade, o apoien.

Fala da responsabilidade da oposición, pero ata onde cedería o goberno para obter consenso?

En calquera negociación todas as partes teñen que ceder, pero eso ten que se discutir a partires da aprobación inicial, que é cando todos imos coñecer cada criterio do Plan. Pódolle dicir que del non coñezo absolutamente nada máis que as súas liñas xerais e o que todo o mundo sabe. Cando o secretario xeral me deu unha copia, eu pedinlle que a lacrara e a asinara. Non a abrín.

Por que?

Porque creo que non é o momento no que a un membro da Corporación lle interese saber como vai quedar unha finca en concreto. A min o que me importa agora é que o documento se adapte á normativa, sexa racional e sostible.

Como resolverán no PXOM a integración do AVE?

Para recollelo no PXOM ten que asinarse o convenio entre as tres administracións no que se fixen os criterios urbanísticos no solo liberado e como van ser a estación e a integración. Hai un protocolo asinado pero imaxino que os aproveitamentos urbanísticos non valen o mesmo e haberá que decidir como quedan.

Aínda ve posible que Ourense teña AVE e nova estación en 2018?

Cremos que é posible. Estanse dando pasos e aínda estamos en prazo para poder chegar a ese ano. O único que quedou en discusión foi reestudiar un pouco a estación, todo o demais estaba aceptado polo ministerio. Nós queríamos un cronograma de prazos e créditos e unhaconfirmación de que a estación de Norman Foster se levaría adiante, ou outra semellante. Para min non é un capricho, Ourense sempre foi moi discriminada en infraestucturas e hoxe non podemos permitirnos que o AVE sirva para que se nos vaia a xente ou pase de largo. Para eso, unha boa estación, que sexa un bo escaparate, é fundamental. É máis, creo que é mellor esperar un pouco máis a non ter unha boa infraestructura.

Cumprirá a promesa electoral da Ronda Termal?

É difícil terminala toda ó longo do mandato, pero temos o proxecto e o seguinte paso é que Fomento nos ceda a N-120 que discurre a carón da marxe dereita do Miño. Neste dous anos, se temos a cesión, unha parte importante pode estar en marcha, porque será un proxecto plurianual.

E o de ter carrís bici?

Temos que facelo posible. A pesares de que as nosas infraestructuras viarias son complicadas e a nosa orografía difícil, estamos analizando como o resolven noutros lugares. Penso que un carril bici pode convivir coas infraestructuras viarias que temos sen necesidade de ter un carril independente e á marxe do tráfico, polo que, alo menos nunha parte importante do noso tramo urbano, haxa un carril bici.

O termalismo non é aínda motor económico. Cando despegará?

As infraestructuras que temos hoxe xa atraen a moita xente, pero é certo que queremos ir máis aló. Para iso hai que centrarse en dúas cousas: infraestructuras de calidade e promoción. Temos que ter un gran hotel balneario nas Burgas e outro na marxe dereita do Miño e estamos traballando para que nun prazo curto os teñamos. Marcamos o compromiso para que a súa execución estea en marcha nun ano. Eso si que daría un salto de calidade para que o termalismo sexa motor económico.

Haberá orzamentos en xaneiro?

Haberá, pero somos un goberno en minoría e temos que contar co apoio da oposición. O goberno vai tratar de facer os deberes para ter un orzamento coas aportacións da oposición. O que non nos poden pedir é que a oposición faga os orzamentos para que os execute o goberno.

Con que lle foi más difícil lidiar: con ter un goberno en minoría, tres concelleiros imputados ou coa división do seu grupo?

O que aprendes na política é a lidiar con calquera cousa. Para min o máis complicado é cando se prantexan problemas e non lle encontramos solución no día a día, porque creo que o grupo hoxe está unido, o alcalde está representado no máximo órgano de dirección do PSdeG-PSOE e estamos remando todos na mesma dirección.

Da por zanxado ese tema?

Si.

Vese respaldado para optar á Alcaldía en 2015?

É moi cedo para tomar esa decisión. A min hoxe o que me interesa é desenvolver todos os proxectos e despois chegará o momento no que decidirei se me vou ou se me presento a esas primarias nas que os militantes decidan quen é o candidato.

Seguirá defendendo que non dimitan concelleiros imputados?

Na miña opinión, un cargo público ten dereito a que se lle respecte a presunción de inocencia, xa que non facelo leva a que se produzan danos irreparables. Vímolo nos paneis, no caso de Pepe Blanco e noutros. Polo tanto pídoo para Marga Martín, os funcionarios e para calquer político de calquer outro partido. Non obstante, se se nos debe pedir máis responsabilidade por ser cargos públicos, ó que apelo é a un acordo de todos os grandes partidos para ver en qué momento ten que abandonar o cargo público. Temos que ser homoxéneos.

Un ano e unha reprobación despois, invitaría de novo ó BNG a unirse ó goberno?

Hoxe é complicado, xa transcurriu moito de mandato, pero sigo trasladándolle ó BNG que a min me gustaría que se incorporaran de novo, como se fai noutros concellos nos que gobernan PSOE e BNG. Pero considero que eles tomaron unha decisión e é normal que se manteñan na oposición. O que pido é o seu apoio para as cuestións máis importantes. n