Taboadela recibe preto dun millón para proxectos de enerxía limpa

O subdelegado do Goberno en Ourense, Eladio Santos, visitou Taboadela, onde aproveitou para destacar a importancia do programa DUX 5.000 para “dar impulso ao desenvolvemento urbano sostible, en municipios do reto demográfico”. O Concello obtivo unha subvención de 868.623,16 euros para proxectos singulares locais de enerxía limpa, financiando o 100% dos proxectos que se levarán a cabo no municipio a través dos fondos Next Generation.

Santos e o alcalde de Taboadela, Álvaro Vila, aproveitaron a ocasión para subliñar que se trata dun proxecto de “gran calado” para o municipio e que permitirá impulsar medidas relacionadas coa “eficiencia enerxética” e promover a “sustentabilidade” no concello. Eladio Santos sinala que esta importante subvención “potenciará proxectos singulares de enerxía limpa, favorecendo a eficiencia enerxética en edificios e infraestruturas públicas, fomentando investimentos verdes e o autoconsumo, potenciando a mobilidade sostible e garantindo a participación de Taboadela no despregamento dunha infraestrutura de recarga e impulso do vehículo eléctrico”.

Vila Araújo, sinala que “se trata dun proxecto moiambicioso que conta con cinco puntos de actuación para mellorar a eficiencia enerxética a nivel municipal”. A visita do subdelegado do Goberno a Taboadela permitiulle tamén recoller as inquedanzas e necesidades do municipio para tratar de darlles solución.