Unha viaxe pola Ciencia a través dunha cita con investigadores de G-Night

A Noite Galega das Persoas Investigadoras (G-Night) este venres a súa cuarta edición, con máis dun cento de actividades de divulgación en rúas, parques, bares e museos de Vigo, Ourense, Pontevedra, Santiago de Compostela, A Coruña, Ferrol e Lugo.

Coordinada pola Universidade de Vigo, que lidera un consorcio formado polas universidades de Santiago e A Coruña; institutos de investigación do CSIC (IEGPS, IEO, MBG e INCIPIT) e outros organismos de investigación galegos (IDIS, CITMAga, SEBBM, CESGA e a RAGC), a G-Night volverá sacar a ciencia dos laboratorios e das aulas para achegala á cidadanía, desta volta, nunha vintena de localizacións.

Encontro dixital sobre a G-Night:

Sobre o que atoparás se vas ao evento con G-Night La Región e Telemilño falaron con tres dos seus protagonistas:

María José Vázquez Figueiredo: Doutora en Psicoloxía Básica e profesora na Facultade de Educación e Traballo Social de Ourense. A súa investigación abarca a Psicoloxía Xurídica (p.ex., delincuencia xuvenil e adulta, victimización) e a Comunitaria (p.ex., programas de intervención, avaliación de programas e intervención, e máis recentemente adiccións).

• José Manuel Salgado Seara: Doutor en Ciencia e Tecnoloxía dos alimentos e Investigador Beatriz Galindo do Grupo BiotecnIA. Lidera unha liña de investigación sobre biorefinería de insectos para obter novas fontes de proteína de alto valor nutricional e derivados de quitina.

• Carlos Barja Márquez: Investigador do grupo de Estudos de Arqueoloxía, Antigüidade e Territorio (GEAAT). O seu proxecto de tese trata o emprego de ferramentas de Realidade Aumentada para a musealización de patrimonio construído de orixe altomedieval e tardoantigo. A súa investigación integrase dentro do proxecto europeo H2020 RurAllure.

Se queres saber o que é e un adianto do que atoparás esta noite no Torgal, en Ourense, ou en calquera outra das principais cidades galegas, non te perdas a conversa da xornalista Lucía Montáns con María José, José Manuel e Carlos.

Ciencia no bar e obradoiros en Ourense

En Ourense o escenario será o Café & Pop Torgal, que o venres 27 de setembro acollerá, a partir das 19.00 horas, dúas charlas científicas: “Aprendizaxe baseada en xogos e o colectivo transxénero”, a cargo de Paula Rodríguez, e “A ciencia axuda a reducir a violencia de xénero”, a cargo de María José Vázquez e Jennifer Rodríguez, traballadora social cun mestrado en menores en conflito. A entrada é libre ata completar a capacidade da sala.

O programa na cidade complétase cun obradoiro de escritura sobre linguas da antigüidade, organizados por persoal investigador do Grupo de Estudos de Arqueoloxía, Antigüidade e Territorio (GEAAT), e para o que será preciso inscribirse previamente.

Actividades na cidade olívica

Por segundo ano consecutivo, a praza do Berbés en Vigo, co edificio Redeiras como punto central, acollerá unha gran feira científica, organizada pola Universidade de Vigo entre as 17.45 e as 22.00 horas. O programa na cidade complétase cunha charla na biblioteca Xosé Neira Vilas e cos obradoiros organizados polo Centro Oceanográfico de Vigo (IEO), que terán lugar no espazo anexo ao Museo Marco entre as 17.00 e as 21.00 horas.

As persoas asistentes atoparán actividades gratuítas dirixidas tanto aos máis pequenos e pequenas da casa coma a toda a familia. Paralelamente á feira, con máis de 20 postos científicos, o edificio acollerá charlas, un xogo de escapada, obradoiros interactivos e un espectáculo de danza. O dúo PÄRBO, integrado por dous dos artistas galegos con máis proxección, Begoña Riobó e Anxo Pintos, poñerán o ramo a este grande evento científico e cultural.

Un dos stands da feira científica, Biorrefinerías de insectos e subprodutos agroalimentarios para un futuro sostible, está deseñado polo grupo de Biotecnoloxía Industrial e Enxeñaría Ambiental (BiotecnIA). Os asistentes poderán coñecer as propiedades dos insectos e como transformar a quitina en envases activos biodegradaveis. Ademais, descubrirán o potencial dos residuos agroalimentarios para obter aditivos naturais. José Manuel Salgado Seara é o IP do grupo.

Durante os días previos á celebración da G-Night levaranse a cabo relatorios de científicos e científicas da Universidade de Vigo nos centros escolares e nos institutos da cidade, no marco da iniciativa Researchers at Schools.

Un paseo pola Pontevedra literaria e a biodiversidade

Pontevedra acollerá un roteiro científico organizado pola UVigo en coordinación coa doutora en Filoloxía Galega e profesora da universidade, Ana Acuña. Ademais, a Misión Biolóxica de Galicia (MBG), centro do CSIC en Pontevedra, levará a cabo un xogo de escapada no que se tratará dunha forma lúdica e orixinal problemas sociais como a perda de biodiversidade, o cambio global, a escaseza de auga, a saúde do solo e das sementes e da súa importancia para alimentar o mundo.

Conciencias creativas é o lema baixo o que se celebrará o evento, asociado á Noite Europea das Persoas Investigadoras, un proxecto de divulgación científica promovido pola Comisión Europea dentro das accións Marie Skłodowska-Curie do programa Horizonte Europa, que se desenvolve simultaneamente en case 400 cidades europeas dende 2005. A Noite Galega das Persoas Investigadoras conta para a súa celebración con recursos propios das entidades que integran o consorcio e co apoio da Xunta de Galicia.