“Voces Femininas” acada a súa maioría de idade

O Festival Voces Femininas, organizado pola Deputación de Ourense en colaboración con Coconut Produccións, acada este ano a súa “maioría de idade”, celebrando 18 anos de traxectoria ininterrompida no calendario cultural galego. Dende os seus inicios, o festival mantivo un obxectivo claro: “poñer en valor e dar visibilidade ás mulleres artistas, tanto do panorama nacional como internacional”, sinalaba César Fernández durante a presentación. O evento regresará ó Teatro Principal de Ourense este venres, 28 de novembro, a partires das 20,00 horas.

Seguimos facendo unha aposta directa pola calidade artística

A presentación do festival serviu para reafirmar o compromiso institucional co proxecto. O vicepresidente segundo da Deputación e deputado de Cultura, César Fernández, subliñou a importancia de manter este tipo de iniciativas no tempo. Durante a súa intervención, Fernández recalcou que o apoio ao Voces Femininas supón unha “aposta directa pola calidade artística” por parte da Deputación de Ourense, consolidando “un formato que este ano se presenta innovador e reforzado”.

O cartel destaca pola súa diversidade e excelencia, reunindo a figuras de primeiro nivel. Por unha banda, o público poderá descubrir a Katherine Priddy, considerada unha das voces máis cautivadoras e prometedoras da nova escena británica actual.

A representación galega virá da man de Raposa, o persoal proxecto de María Villanueva con arranxos de Rubén Abad; unha proposta que explora sen complexos paisaxes sonoras que abrazan xéneros tan diversos como a música clásica, o jazz, o pop ou a canción protesta. O trío complétase con Laaza, a iniciativa da barcelonesa Laura Aznar, quen sorprenderá cunha fusión única de pop alternativo, a tradicional xota e a electrónica.