As Xornadas de Folclore empezan coa música e os bailes da provincia

A XXXIX edición das Xornadas de Folclore de Ourense comezou onte a súa andadura coa tradicional e colorida cerimonia inaugural na que participaron os representantes das agrupacións encargadas de amosar o folclore de Colombia, México, Panamá, Serbia, Senegal e Taiwán por toda a provincia. A emblemática Escola de Danza-Castro Floxo da Deputación foi a encargada de amosar aos visitantes unha mostra do folclore ourensán neste primeiro acto das xornadas. Mentres, os representantes dos seis países participantes subiron ao escenario ataviados cos seus traxes tradicionais.

O deputado de Representación Institucional, Rosendo Fernández, deulles a benvida ao Teatro Principal, “un templo cultural que hoxe nos acolle para dar saída a un dos eventos máis esperados do verán cultural ourensán, pola espectacularidade e calidade que ofrecedes” e definiunos como “os mellores embaixadores de Ourense nos vosos países”.

Esta cita co folclore de diversas partes do mundo está organizado pola Deputación de Ourense, a través do Centro de Cultura Popular Xaquín Lorenzo, e coa colaboración da Consellería de Cultura, Lingua e Xuventude e os diferentes concellos que acollen este evento.

Ata o próximo 21 de agosto as agrupacións Fundación Ballet Folclórico de Nobsa (Colombia), Ballet Folk. Instituto Tecnológico de Celaya (México), Academia Andrés Valiente, Danzas y Proyecciones Folklóricas (Panamá), Kud Srem (Serbia), Ballet Jammu (Senegal) e Yuan Yuan Dance Group (Taiwán) amosarán as súas danzas e música tradicionais en 16 vilas ourensás. Esta tarde estarán en Celanova e O Barco.