Xulia Formella, unha das mellores notas da EBAU en Ourense: "É peor o propio curso que o exame""

Tras moitos anos de estudo, non só no instituto, pois Xulia Formella tamén estuda no conservatorio de música, onde aprende a tocar o violín e o contrabaixo, como ela di "o pequeno e o grande", ademais de toda a teoría musical detrás de ambos os dous instrumentos, esta moza ourensá logrou unha das mellores notas de Ourense na EBAU e unha das mellores de Galicia.

Agora, xa pasados os nervios e a presión do exame, Xulia fálanos de como viviu este curso e os días previos á proba.

O primeiro de todo, que nota obtiveches?

Quedeime preto do 14, cun 13,584.

Cantas horas de estudo adicaches diariamente para acadar esta nota?

Diariamente non che sabería dicir, pero si é verdade que levo o estudo moi ao día. Como vou ao conservatorio cos dous instrumentos, son moitas clases á semana que teño pola tarde a maiores do instituto entón, claro... Pola semana estudar era complicado, así que as fins de semana dende a mañá ata a noite, prácticamente. Entre semana, despois de comer e en ocos libres. Tempo libre pouco...

Que farías para relaxarte cando non estabas estudando?

É estresante o feito de ter tantas horas pola tarde no conservatorio pero si que é certo que cambias o "chip". Ao facer outra cousa, libéraste.

Íaseche o exame da cabeza namentres?

O agobio e a presión están aí sempre.

Tíñaslle medo ao selectivo?

Si... Tamén é verdade que che meten máis medo do que en verdade é porque, despois, vas alí e rematas en seguida. O peor é o propio curso, de tanto agobio, que o propio exame que son tres días e remata.

Agora que xa pasou, foi "para tanto"?

A ver, non é sinxelo, pero tampouco é imposible.

Que carrera tiñas en mente?

Non teño nin idea polo momento. Fíxeno o mellor que puiden para despois ter onde escoller.

Agora que pasou, vénseche algunha á cabeza?

Non, agora poñereime a ver que hai.

Hai algunhas que che gusten?

Pois non, teño que mirar, polo momento non teño nin idea.

Algún consello para os estudantes que afrontarán o selectivo o ano que vén?

Que estuden pero que tampouco se teñen que volver tolos. Unha nota non os define.