Pataca, becerro e viño, ingredientes da futura nova feira de Cualedro

Cualedro estreará este ano unha nova feira gastronómica na comarca, e que xirará en torno aos produtos locais. Así, exaltaranse as patacas da Indicación Xeográfica Protexida (IXP) Pataca de Galicia, un cultivo que comparte coa veciña Limia, así como o becerro dos seus pastos a través da IXP Tenreira Galega.

A maridaxe deses dous alimentos corresponderalle ao viño da Denominación de Orixe de Monterrei, agora que Cualedro parece estar preto de introducir viñedos do seu territorio no Consello Regulador.

Con este obxectivo, o alcalde, o popular Luciano Rivero, reunise recentemente con Martín Alemparte, director da Axencia Galega da Calidade Alimentaria (Agacal), dependente da Consellería do Medio Rural. Durante este encontro déronse os primeiros pasos de cara á celebración deste novo evento, no que se exaltarán produtos co selo de Galicia Calidade.

“Finais de xuño”

Rivero afirma que a feira consistirá “nunha degustación de produtos da nosa terra, con música, que incentive o comercio local”, e que está pendente “da data de celebración, pero todo apunta ao último fin de semana de xuño”. O mandatario ten previsto reunirse agora “co presidente da Deputación para contar coa súa colaboración”.