O CES recomenda reforzar educación e investigación para garantir crecemento

O Consello Económico e Social (CES) considera prioritario reforzar as actuacións no campo da educación, da investigación e da innovación para garantir o crecemento sustentable que rexistra xa a economía galega.

A presidenta do CES, Corina Porro, presentou nesta mañá nunha rolda de prensa o informe da Memoria 2013 sobre a situación económica e social de Galicia, acompañada polos membros do equipo que elaborou o documento.

O informe do órgano consultivo galego revela que a Comunidade Autónoma modificou a súa tendencia e deixou atrás a recesión económica durante o terceiro trimestre do ano pasado.

Para manter o ritmo positivo, a Memoria do CES considera que un dos piares en que se debe apoiar o crecemento da economía pasa por non desatender e dar prioridade ás actuacións no campo educativo, "como piar fundamental en que asentar e impulsar o desenvolvemento económico e a mellora do benestar social", e no da investigación, o desenvolvemento e a innovación, destacou a presidenta do CES.