Desestimada 'integramente' a demanda de Martinsa contra Manuel Jove por uns terreos de México

A sentenza indica que 'non existe forma ningunha de determinar con exactitude o valor de mercado dun terreo e a súa correspondencia co prezo, posto que, en definitiva, o valor só se concreta no prezo que un terceiro estea disposto a pagar por el'.

'Pero si cabe polo menos concluír que as premisas de que parte o informe Protiviti (achegado pola administración concursal de Martinsa) non poden ser aceptadas, nin serven para concluír que os administradores demandados asignaran conscientemente ao terreo un prezo superior ao de mercado en dano da compañía que administraban', indica a sentenza, segundo informa Inveravante, corporación de Manuel Jove.

CONTENCIOSO DE 2010

A sentenza, que se pode recorrer ante a Audiencia Provincial, dítase sobre un contencioso que ten a súa orixe en setembro de 2010. Na devandita data, en pleno proceso concursal de Martinsa, a súa administración concursal presentou unha demanda contra Jove e o exconselleiro delegado de Fadesa Antonio de la Morena na que reclamaban presuntos danos pola venda a Martinsa duns terreos en México por un prezo supostamente superior ao valor do mercado.

Os terreos están situados no Estado mexicano de Baixa California, en Loreto, e foron adquiridos por Manuel Jove a título particular en 2004, cando a empresa que entón dirixía (Fadesa) non tiña interese en estar presente no mercado mexicano.

Dous anos despois, en 2006, no marco do acordo de compravenda de Fadesa por parte de Martinsa, sociedade de Fernando Martín, as dúas partes asinaron un acordo adicional de compravenda doutros activos que incluía o terreo de Loreto. O prezo acordado para a venda dos terreos foi de 118 millóns de euros.

A administración concursal de Martinsa Fadesa, grupo que se declarou insolvente en xullo de 2008, presentou unha demanda pola operación do solo de México pouco antes de que marzo de 2011 a inmobiliaria superase o concurso e, polo tanto, os administradores cesasen dos seus cargos.