O cartel do desfile infantil, obra do CEIP de Medeiros

O Colexio de Educación Infantil e Primaria (CEIP) de Medeiros, na vila de Monterrei, foi o encargado de deseñar o cartel oficial do desfile infantil do Entroido de Verín deste ano, que unha vez máis volverá percorrer as rúas e prazas verinesas a mañá do Xoves de Comadres, o vindeiro 27 de febreiro.

Os distintos colexios participantes no desfile, de concellos como A Mezquita, Castrelo do Val, Cualedro, Monterrei, Riós, Verín e Vilardevós, votaron entre as dúas propostas realizadas polo centro de Medeiros.

Así, continúa un ano máis a tradición de que sexa o centro que abre o desfile o encargado do cartaz, unha obra a base de collage que desta vez representa un capuchón mediante distintos deseños e estampados.

Premio

Como recompensa pola súa creatividade e orixinalidade, o CEIP de Medeiros recibirá un vale por un importe total de 400 euros que poderá destinar á adquisición de material escolar e deportivo en establecementos locais da vila do Támega.