Os chocalleiros serán as referencias en Vilardevós

A asociación cultural Os Chocalleiros é a organizadora do Entroido de Vilardevós, tras recuperar esta celebración hai xa 10 anos. Deste xeito, os chocalleiros, vestidos coas súas caretas, lucindo cores e cunha vara con farrapo na man, volverán saír as rúas para asustar, manchar e levar á xente non disfrazada a que os convide a un viño.

A celebración, na que colabora o Concello, a Deputación e a agrupación de Protección Civil local, arrancará o vindeiro xoves, 20 de febreiro, co Xoves de Compadres. Unha semana máis tarde, o día 27, terá lugar o tradicional Xoves de Comadres.

Dous días máis tarde, o sábado 1 de marzo, os chocalleiros participarán no desfile que sairá do campo de fútbol, acompañados polo novo folión da localidade, O Can do San Roque, e xunto coa Banda de Gaitas de Vilardevós. Todos confluirán na Praza do Cruceiro, onde seguirá a troula e a música. Ás 19,00 horas actuará a charanga Bicoia, e á tarde-noite haberá unha cea popular, trala que sairán os fachóns e o Meco dende O Toural. O peche da noite correrá a cargo da discomóbil R. Deluxe Eventos.

Desfile

O luns, 3 de marzo, será o desfile da man do centro residencial e do centro de día, das casas niño “Lala” e “Garabatos” e do CDR Portas Abertas, aberto á veciñanza.