As comadres darán o pistoletazo de saída ao Entroido de Celanova

A cea-baile de Comadres de Celanova alcanza este ano a súa décimo sexta edición. Unha celebración fixada para o sábado día 3 de febreiro a cal están invitadas todas as mulleres da bisbarra. Maite Estévez e Charo Gómez son a cara visible da Asociación de Comadres Celanova, que conta co apoio dun grupo de persoas e diferentes entidades. “Este ano imos superar as comadres doutros anos, porque se están apuntando a tope. 80 mulleres en tres días”, comentaba Maite Estévez.

A celebración, que arrancará ás oito da tarde cun pasacalles dende a coñecida como Calle Abaixo -oficialmente Manuel Lezón- e seguirá polas rúas do centro histórico ata ás dez da noite, hora na que comezará a cea no antigo refectorio do Mosteiro de San Salvador. “O último día para anotarse será o 1 de febreiro”, lembran as organizadoras, que explicaron como a partir das doce da noite, aproximadamente, se abrirán as portas do salón para o baile, ao cal poderán acudir os homes disfrazados de muller e as mulleres que non poidan ir a cea. “Sempre e cando veñan disfrazados. É unha festa de disfraces”, matizaba Charo Gómez.

A batucada Lenha Verde animará o pasarrúas, mentras que o grupo Galia será o encargado de animar a festa nocturna. O prezo para participar no evento é de 30 euros para a cea-baile (cinco euros aquelas que so vaian ao baile).

Despois de 16 edicións, as organizadoras desvelan que o segredo radica en “quererlle ao pobo e querer traballar por Celanova”, respondía Maite Estévez. “E o Entroido, que nos encanta. Aquí sempre houbo “a mascarita”, como dicía a miña nai. Aquí temos Entroido, non como noutros sitios pero, si montas algo, a xente aparece”, concluía Charo Gómez.