O oso eclipsa o Entroido rural de Sande, en Cartelle

A captura do oso, nun entorno idílico entre carballos e castiñeiros nos arredores de Sande (Cartelle), estase converter nunha das citas imprescindibles para quen quere desfrutar dunha festa enxebre, tradicional e familiar. E onte o volveu a demostrar cun éxito de participantes e organización, na xornada inicial do ciclo de entroido local. Varios centos de persoas desfrutaron da comida ao aire libre nas adegas de Mogos, onde non faltou a música e a retranca, con personaxes e imaxinación que se mexturaban na paisaxe das adegas de Mogos. “Fóra plásticos”, pediu xentilmente a organización en aras a unha vestimenta máis acorde ao espazo e ao ritual, e así o entenderon os presentes que se multiplicaron na sobremesa para asistir á captura do salvaxe animal.

A festa, onde non faltou a música tradicional cos gaiteiros Somos nós, prolongouse tras a captura coa degustación de Sopa de Pedra da man da Asociación cultural Entroido As Bonitas de Sande.

O ciclo entroideiro nesta parroquia continuará hoxe, coa esperada saída das bonitas que ás 10,15 horas recibirán aos fregueses á saída da misa, percorrendo despois as aldeas da parroquia. O martes será o día do “desfile”, coas bonitas, o oso, a vaca e avutardas polo pobo de Sande e, ao remate, comida popular para a cal quedan prazas libres.