Regresan para quedar as damiñas brancas da Seara

Cartelle sumaba onte o terceiro vértice ao seu particular triángulo máxico. A implicación e colaboración veciñal fixo posible a recuperación do traxe das damiñas brancas da Seara que, acompañadas dos vimbieiros, onte volvían a desfilar pola aldea. Dende o local social ata a San Roque, pasando polas casas de aqueles veciños máis maiores que, dende a ventá ou convidandolles a entrar nas súas moradas, compartían a felicidade por ver de novo o Entroido no pobo.

A recuperación da festa despois do medio século, e que suscitou a curiosidade e interese de veciños e forasteiros, acabou cunha comida de confraternización no local social con máis de 40 comensais. Para o ano, comentaban os presentes na sobremesa, o reto estará na procura do carro e na feitura dun novo meco que complete o ritual de antano.