Adxudicados pola Xunta de Galicia xa mil millóns dos fondos de recuperación

A Xunta xa adxudicou 1.027 millóns de euros do Mecanismo de Recuperación e Resiliencia, case o 90% do importe publicado en convocatorias e licitacións. Así o avanzou onte o conselleiro de Presidencia, Xustiza e Deportes, Diego Calvo, que se encargou de presidir o Consello da Xunta en ausencia de Rueda, que asistíu á executiva do PP en Madrid. Ademais, “a boa execución en Galicia” tamén a confirma os datos do Ministerio de Economía, que indican, segundo sinalou Calvo, que Galicia é a comunidade “con maior taxa de resolución dos fondos MRR: un 78,8%” (22,2 puntos máis que a media das comunidades e 20,2 puntos máis que a Administración xeral do Estado).

Segundo o informe analizado polo Consello, na actualidade, a suma dos recursos do MRR asignados polo Goberno central á Administración galega ascenden a 1.545 millóns de euros, o 5,8% do distribuído entre as comunidades autónomas, o que supón menos recursos dos que corresponderían á comunidade por PIB per cápita. Desa cantidade, a Xunta ten ingresados 1.453 millóns. Hai que lembrar que estes fondos se poden executar ata o ano 2026.

Na práctica, tal e como explicou o conselleiro, a Xunta está dando apoios “a máis de 53.000 persoas e 5.000 empresas ou entidades locais” a través destes fondos. As actuacións, informa a Xunta, concéntranse nas compoñentes do Plan relacionadas coa mobilidade sostible, as enerxías renovables, as políticas públicas para o mercado de traballo, a renovación e ampliación do Sistema Nacional de Saúde, a implantación da Axenda Urbana, a dixitalización, a modernización do sistema educativo, a economía dos coidados e a inclusión social.

Espazo Único Dixital

O conselleiro de Presidencia tamén avanzou que a Xunta vai destinar 5 millóns de euros á posta en marcha dun nodo de datos cidadá que concentrará toda a información sobre o cidadán e as súas relacións coa administración nun único punto. Simplificarase o acceso a toda Administración dixital e facilitaranse servizos adaptados. A carpeta cidadá da sede electrónica evolucionará para converterse no punto de acceso a todos os trámites dos cidadáns coa Administración. Haberá un rexistro único que permitirá unha identificación unívoca do cidadán, independentemente do sistema que empregue (Chave 365, Cl@ve, certificado dixital, DNIe) ou do departamento co que realice a xestión. Esta iniciativa enmárcase no III Plan de Administración e Goberno Dixital 2025.

Tamén onte, o Consello deu conta da resolución da orde de axudas para “a valorización, segunda transformación e ecoinnovación de produtos forestais”. A medida, que a Axencia Galega das Industrias Forestais, permitirá mellorar a competitividade das pequenas e medianas empresas que conforman o sector e limitar os impactos ambientais da actividade. Disporanse 4 millóns de euros.