Cambados nomea ós novos embaixadores do albariño

A LXXIII Festa do Albariño de Cambados pecha hoxe cinco días de celebración e exaltación do viño da D.O. Rías Baixas cos nomeamentos dos novos Cabaleiros e Donas do Capítulo Serenísimo. As distincións suporán para estes ‘embaixadores’ a defensa e promoción do que para moitos é “o mellor viño branco do mundo”.

Nesta edición, as Donas do Albariño serán a conselleira de Economía e Industria, María José Lorenzana, a actriz e presentadora, María Mera, e María José García-Pelayo Jurado, alcaldesa de Jerez de la Frontera e presidenta da Federación Española de Municipios e Provincias (FEMP).

Os novos Cabaleiros do Albariño serán o presidente da Federación Española do Viño e de Bodegas Vionta, Pedro Ferrer, e Celestino Pintos, bodeguero e viticultor cambadés.

A Orde tamén fará as distincións de Albariñenses de Honra ao presidente da Federación de Industria e Comercio de China en España, Chen Shengli, e a Juan Sagredo, maxistrado do Tribunal Superior de Xustiza de Galicia.

Outra das distincións serán as Follas de Prata, que recoñecen o compromiso e a colaboración coa Festa do Albariño de diversas persoas e entidades. Entre elas, figuran o delegado do Consorcio da Zona Franca de Vigo, David Regades; o alcalde de Vilacarrillo (Jaén) e fiel defensor da festa cambadesa, Francisco Miralles; o deputado provincial, Javier Tourís; o Mestre da cofradía Vinhos do Douro, Justine Teixeira; e o presidente da Asociación Colón Gallego Celso García de la Riega; xunto a Miguel Ángel Fuente, fundador e presidente honorífico dos Cabaleiros do Sabadiego de Noreña; e Dilma Laranja, presidenta da Real Cofradía da Vila de Comite en Vila do Conde.

O acto de investidura será ás 13.30 horas no Pazo de Fefiñáns, pero previamente comezará o desfile do medio centenar de cofradías gastronómicas que participan nesta edición procedentes de toda España e Portugal. No mesmo lugar, producirase un hermanamento do viño albariño cos de Jerez de la Frontera, símbolo da tradición andaluza, e coa Confraría da Caldeirada de Peixe e do Camarão de Espinho.

A festa continuará durante todo o día coas 42 casetas de 44 adegas no Paseo da Calzada, e con música ata a noite, cando un espectáculo piroténico no Paseo Marítimo de Cambados porá o broche de ouro a unha edición que prevé un peche multitudinario.

En canto a calidade dos viños, o Consello Regulador da D.O. Rías Baixas calificou de “excelente” a colleita do 2024, unha valoración que apoiaron os catadores do concurso desenvolvido no Parador de Cambados ao longo da festa. Os viños gañadores daranse a coñecer durante a comida oficial e foron seleccionados entre 52 propostas.