Case 30 concellos de Ourense, en especial vixilancia polo nematodo do piñeiro

O Diario Oficial de Galicia (DOG) publicou este venres 14 de febreiro a resolución da Consellería do Medio Rural, na que se declara a contención da zona demarcada das Neves, en Pontevedra, do nematodo do piñeiro, onde se establece unha nova zona demarcada e as medidas para o control deste organismo de corentena.

Malia as actuacións realizadas, non foi posible erradicar este organismo nocivo e constatouse que a súa presenza foi continuada e progresiva e que o número de positivos foi en crecemento, especialmente a partir do 2018.

Na resolución declárase a aplicación das medidas de contención na zona demarcada das Neves. Ao tempo, establécese unha nova zona demarcada neste mesmo concello, suxeita a medidas de contención, que substitúe á anterior área de erradicación. A nova zona demarcada estará formada por unha área infestada e outra tampón de 20 quilómetros ao redor da infestada. Na propia resolución pódese consultar o mapa con esta zonificación:

No mapa, a área infestada correspóndese coa delimitada dentro da liña vermella e a tampón, coa azul.

Así mesmo, na resolución defínense os concellos total ou parcialmente incluídos na zona demarcada.

Concellos total ou parcialmente incluídos na zona infestada

A Cañiza, A Guarda, Arbo, As Neves, Baiona, Covelo, Crecente, Fornelos de Montes, Gondomar, Mondariz, Mondariz-Balneario, Mos, Nigrán, O Porriño, O Rosal, Oia, Pazos de Borbén, Ponteareas, Redondela, Salceda de Caselas, Salvaterra de Miño, Tomiño, Tui e Vigo, na provincia de Pontevedra.

Concellos total ou parcialmente incluídos na zona tampón

A Arnoia, Avión, Bande, Beade, Beariz, Boborás, Carballeda de Avia, O Carballiño, Cartelle, Castrelo de Miño, Celanova, Cenlle, Cortegada, Entrimo, Gomesende, Leiro, Lobeira, Lobios, Melón, Padrenda, Pontedeva, Quintela de Leirado, Ramirás, Ribadavia, San Amaro, Toén e Verea, na provincia de Ourense.

A Cañiza, Bueu, Cangas, Cerdedo-Cotobade, Forcarei, Covelo, Crecente, Fornelos de Montes, A Lama, Marín, Moaña, Poio, Ponte Caldelas, Pontevedra, Pazos de Borbén, Redondela, Sanxenxo, Soutomaior, Vigo e Vilaboa, na provincia de Pontevedra.

Medidas de prevención

Neste territorio da zona demarcada deberán executarse unha serie de medidas de contención que se explican na resolución. Algunhas delas obrigatorias, como, entre outras, as que teñen os propietarios das parcelas ou as administracións implicadas da zona infestada de cortar todas as árbores sensibles nas que se detecte a presenza do nematodo, así como de retirar e eliminar as plantas cortadas e os restos de corta tomando todas as precaucións necesarias para evitar a propagación do organismo e os seus vectores. 

Ademais, os propietarios das parcelas ou as administracións implicadas da zona tampón teñen a obriga de identificar e cortar todas as plantas sensibles mortas, con mala saúde, ou afectadas por incendios forestais ou tormentas. A resolución tamén contempla unha serie de condicións para a circulación e traslado tanto das plantas como da madeira e a codia sensibles fóra das zonas demarcadas e de zona infestada á zona tampón.