A comisión aproba a candidatura de Dolores Fernández Galiño como Valedora do Pobo

A Comisión de Peticións do Parlamento de Galicia aprobou este luns o nomeamento da maxistrada María Dolores Fernández Galiño para ocupar o cargo de Valedor do Pobo, unha candidatura que terá que ser aprobada o vindeiro mércores no pleno extraordinario da Cámara.

O nomeamento saíu adiante co voto favorable de PPdeG e PSdeG, a abstención de En Marea e o grupo mixto e a negativa do BNG, o que, traducido ao pleno extraordinario de mércores, no que é necesaria unha maioría cualificada -tres quintos da Cámara, 45 deputados-, supoñería a aprobación ao nomeamento de Fernández Galiño.

En Marea, BNG e grupo mixto foron críticos co procedemento seguido para elixir a unha nova Valedora do Pobo, xa que entenden que esta é "de parte" e foi elixida por PPdeG e PSdeG sen consultar ao resto de formacións.

Mentres tanto, a deputada do PSdeG Patricia Vilán destacou que a súa formación "non bloquea institucións" e que a candidata "coincide co que o PSdeG quere que sexa unha Valedora do Pobo, comprometida co feminismo, o galeguismo, a igualdade, os dereitos humanos, as liberdades públicas e a transparencia das institucións".

A viceportavoz parlamentaria do PP, Paula Prado, destacou a folla de servizos de Fernández Galiño, maxistrada da Sección Segunda da Audiencia Provincial da Coruña e xuíza no caso do Prestige, e agradeceu o seu labor á anterior Valedora do Pobo, Milagros Otero, á vez que acusou á oposición de "tentar trasladar unha imaxe de deterioración da institución".

Milagros Otero renunciou formalmente ao cargo o pasado martes, catro meses despois de que o Tribunal Superior de Xustiza de Galicia rexeitase un recurso á sentenza que a condenaba polo nomeamento como xefa de Persoal de María Puy Fraga, irmá do portavoz parlamentario do PPdeG e sobriña do falecido fundador do PP Manuel Fraga.